香港新浪網 MySinaBlog
« 上一篇 | 下一篇 »
Ben | 3rd Jan 2019 | 一筆過 | (614 Reads)

昨日閱新聞一則:「蔡瀾批火鍋最沒文化該消失」,看到時真係無名火起三千丈。

Picture

一則蔡生的飲食喜好,一向不敢苟同,坊間傳言,但凡食肆貼其讚好的海報,便不用去幫襯,免得瀬嘢。
二則打邊爐係本人至愛,早在多年前已在這寫過一篇《打邊爐》;鬼整吖,已經十年幾前,時間做乜過得咁快呢?十年來話要做的事,有幾多樣做到呢?……又好多都做到喎,做不到的只是天時地利人和不配,不勉強而已。
拉得太遠,回到正題。之後便見到不停有網文、民聲討其所言。立時心都涼快些,原來有咁多邊爐友有相同的睇法。
然而,怒氣稍下,人開始冷靜下來,細心想想,不講蔡生其食格,但他是一位資深跑江湖公關,這麼多年來曆練,何解會公然挑釁大眾呢?
再看看那條片,看完便明白。
那內地綜藝節目《天天向上》,蔡生被問「如果你有特權讓世界上一道菜消失,你認為應該是哪一道菜?」
換你是如何答?粵、川、滬、潮、法國、意大利、印度、泰國、韓國、日本……其中的一道菜?
任你答邊樣都會死,因為一定會挑起當地人民的情緒,甚至那些大廚會群起而攻。
火鍋則沒有地區性,預就預咗有人會鬧,指責其不懂欣賞火煱,但不會有人因此說他不懂吃。因火鍋真的不用像其他菜色般,要花廚師一番心思去烹調,也不會令食客如數家珍的對菜色指指點點。
因此,推斷蔡生是一早知題目,亦知這是一個氹,只是不能不踩,但點踩先令到對腳冇咁濕呢?
薑還是老的辣。
可能真係打得邊爐多,一淥即食,冇用時間去思考,人云亦云,罪過,要罸自己食多幾餐打邊爐!