香港新浪網 MySinaBlog
« 上一篇 | 下一篇 »
Ben | 8th Apr 2019 | 一筆過 | (165 Reads)

在我家附近的一個大型街市,小說都有十多檔賣豬肉的,電視台的飲食節目長年都在這些檔口拍買豬肉,只是街坊看見都掩咀笑,因為識買都不去那些檔,這裏有一檔很誇張,每朝早都有一大條龍排隊買豬肉,排的時間快則十分八分鐘,慢則近半小時都會。
以前一見這條龍便走去幫襯其他檔,心想買嚿豬肉煲湯啫,駛唔駛排隊呀?
但天生賤骨頭,就是好奇八卦心太強,倒瀉米田共都想去看是甚麼一回事,於是走去跟啲街坊排,見到有啲阿太及外藉傭人出手好闊綽,一買便是百多二百個大洋豬肉,自己諗住買十零個吊錢脢頭,會唔會俾人識穿我係霉友扮「唏碧士病打」排隊呢?幸好照買到,返歸煲湯或蒸煮,出來的味道又真係鮮些,試過趕時間不去排隊,在其他檔口買,結果真係出來是兩回事。而這個檔很特別,只有一個豬肉佬斬豬肉時才有人龍,換了其他人之後,檔口立時消失長龍,這位豬肉佬看上去年紀約莫六十多,但卻是身材瘦削,絕不像其他的豬肉佬般肥屍大隻。

Picture

 私隱問題,沒有拍照,借張圖用用。

前一年,這個檔口不常見到他,換了其他豬肉佬,發現買的豬肉走晒樣,自己是不相信的,因為都是該檔自己入貨,冇理由是會變質,但發現那些豬肉佬,售賣態度奇差,有一位疑似是太子爺,串咀、咬住口煙斬豬肉不特止,還要夠膽求其俾貨人,有次我買豬腱,他竟然切件瘦肉給我,付錢時面帶不滿的望住他,他立時眼往上望,不敢與我有眼神接觸。
未幾這檔口的人流眼見有一大半流失,過了一輪,在另一區的商場見到這個豬肉佬與相信是太太的在逛,有個相估道是他們街坊,走去與他倆打招呼:「點解呢個鐘數見到你嘅(中午時段)?」豬肉佬好唏噓的回答:「老闆話我年紀大喎,唔好咁辛苦,唔使再成日返,俾啲後生去做喎。」這都是自己估到的原因。
只是真正老闆是不會同錢鬥氣的,你估個老闆唔知生意額急速下降麽?又會唔知原因出在那處嗎?
一段時間後,見呢位豬肉佬又在企番喺檔口位,人龍又再出現,他不在時,人龍又消失。為甚麼他在的時候會咁多客?
兩個字──專業,今年過年時又整盆菜,突然臀部痕,想整多些腩肉咬,那日是開始有鮮肉開始供應,為免一早俾人買晒,於是一早諗住去排隊,點知新年期間人人都食到飽飽,冇乜人買豬肉,所以不用排隊,就問他有冇靚五花腩,他一手便抽出一大件,力指呢件包我食過話正,於是買了兩大斤返歸,最後我只食到兩件,其餘俾食客食晒。

Picture

今日又走去買料煲湯,跟他說買煲湯骨,他問我食唔食,我話食,但心諗,食唔食,煲完湯的肉都係嚡烚烚啦!結果,煲完湯的肉仲係滑淋甜。

排我前面的一位女士,買肉排時問了他一些東西,他續一解說:「呢嚿肉排好難有咁靚,食唔晒分兩日食,唔好洗,用保鮮紙包好放入冰格,一兩日後食都冇問題……我梗幫妳斬開,妳返去自己斬唔到。」

那位女士說:「見你喺度我先過嚟買同敢問咁多咋。」

明白人龍成因吧?


[1]

專業加良好的服務態度或許是他吸引客人的原因之一。

今天那些服務行業的服務態度有很多是不合格的,例如一些中式酒樓的員工多為四、五十歲,經常對顧客的態度是假裝聽不到、看不到,一些化妝品連鎖店的職員同樣是悔悔氣氣的。

易明
[引用] | 作者 易明 | 9th Apr 2019 | [舉報垃圾留言]

對,專業加好態度,天下無敵。

[引用版主回覆] | 作者 Ben | 9th Apr 2019